Fevralın 2-də elan edilmiş müsabiqəyə əsasən Azərbaycan Qran Prisinin 3 min könüllüsü yarış zamanı göstərdikləri fəallığa görə qiymətləndirildi və yüksək fəallığı ilə seçilən 260 könüllü növbəti mərhələyə buraxıldı. Bu mərhələdə sözügedən könüllülər yarışa hazırlıq ərəfəsində BŞH Akademiyasında keçirilmiş seminarlar, Formula 1 Avropa və Azərbaycan Qran Priləri və ümumilikdə Formula 1 tarixindən test üsulu ilə hazırlanmış imtahanda iştirak etdilər.

Qalib könüllülərin adları Azərbaycan Qran Prisi könüllüləri üçün təşkil edilmiş “Təşəkkür” mərasimində Bakı Şəhər Halqası Əməliyyat Şirkətinin icraçı direktoru Arif Rəhimov və şirkətin insan resursları və işçi qüvvəsi departamentinin rəhbəri İranə Əhmədova tərəfindən elan edildi.

Könüllülərdən Əhməd Şahbalayev, Sitarə Şərifzadə, Haqverdi Məmmədov, Emin Əlizadə və Səkinə Qəhrəmanzadə ən yüksək nəticə nümayiş etdirərək müsabiqənin qalibləri adına yiyələndilər. Qaliblər üçün sertifikat bu adı qazanmış könüllülərə təqdim edildi. Qalib olan könüllülər sentyabrın 3-də İtaliyaya səfər edərək Qran Pri yarışını tribunada canlı izləyə biləcək və həmçinin həmkarları ilə qarşılıqlı əməkdaşlığa dair fikir və təcrübə mübadiləsi aparmaq imkanına sahib olacaqlar.

BŞH- nin İcraçı direktoru Arif Rəhimov qalib olan könüllüləri təbrik etdi, inkişafa gedən yolda onları dayanmadan öz üzərlərində çalışmağa səslədi. “Azərbaycan Qran Prisinin uğurla həyata keçirilməsində könüllülər xüsusi rol oynadılar. Buna görə sizə minnətdarıq! Könüllülük inkişafa gedən yolda ilk addımdır və inanıram ki, BŞH-nin bu istiqamətdə atdığı addımlar könüllülərin daha da yüksək nəticələr əldə etməsi üçün gözəl şərait yaradacaqdır”

BŞH-nin İnsan Resursları və İşçi Qüvvəsi şöbəsinin rəhbəri İranə Əhmədova qalibləri təbrik edərək gələcək yarışların könüllülərini daha fəal olmağa səslədi: “Builki yarışa hazırlıq çərçivəsində biz könüllülərimizin fərdi inkişafı üçün müxtəlif mövzularda proqramlar hazırladıq və bu proqramları yüksək səviyyədə həyata keçirdik. Könüllülərimizin inkişafı bizim qarşımızda duran ən vacib məsələlərdən biridir və biz növbəti illərdə də bu ənənəni daha intensiv şəkildə davam etdirəcəyik.

Müsabiqədə iştirak edən hər bir könüllüyə təşəkkürümü bildirirəm. Qaliblərin hər birini akademiyamız adından təbrik edirəm, onlara xoş səfər və gözəl istirahət arzulayıram. Əminəm ki, növbəti illərdə könüllülərimiz yarışa hazırlığın ilk pilləsindən yarış başa çatanadək davam edən proses ərzində  yüksək fəallıq nümayiş etdirərək daha da böyük uğurlara imza atacaqlar.”