Bakı Şəhər Halqası Formula 1 könüllüləri üçün daha bir seminar keçirib
20 noyabr 2017

Bakı Şəhər Halqası Əməliyyat Şirkəti (BŞH) Akademiyasının təşkilatçılığı ilə 2018 Formula 1 Azərbaycan Qran Prisinin könüllüləri üçün “Nitq mədəniyyəti – Beynəlxalq tədbirlərdə ünsiyyət modeli” mövzusunda seminar keçirilib.

Tanınmış teleaparıcı Ceyhun Əlinin təlimi əsasında baş tutan seminarda könüllülərə yarış ərəfəsində xarici qonaqlarla düzgün ünsiyyətin qurulması və bu ünsiyyətin ölkənin imicinə təsir mexanizmləri haqqında məlumat verilib.

Təlimçi C.Əli seminar zamanı öz təcrübəsini könüllülərlə bölüşüb və nitq mədəniyyətinə dair müxtəlif məsələlər, o cümlədən nitq mədəniyyətinin vacibliyi və nitqdən düzgün istifadə qaydaları haqqında ətraflı çıxış edib.

Seminarın sonunda C.Əli iştirakçıların verdiyi bir çox suala praktiki izahla aydınlıq gətirib. Böyük marağa səbəb olan seminarda 100-dən çox könüllü iştirak edib.

Qeyd edək ki, BŞH könüllülər üçün yarışa qədər olan müddət ərzində müxtəlif mövzularda təlim və seminarlar keçirməyə davam edəcək.