“Gələcək Karyeralar: Necə Aktual, Hazır və Tələb Olunan Qalmaq Olar” mövzusunda BCC Academy-də panel müzakirəsi keçirilib

BŞH Akademiyasının proqramı çərçivəsində “Gələcək Karyeralar: Necə Aktual, Hazır və Tələb Olunan Qalmaq Olar” mövzusunda panel müzakirəsi baş tutub. Tədbirdə gənclərin inkişafı, məşğulluq imkanları və gələcək karyera perspektivləri müzakirə olunub.

Panelin spikerləri — Worley şirkətinin baş direktoru Aytən Babayeva, BP-nin Xəzər regionu üzrə vitse-prezidenti Bəxtiyar Aslanbəyli və AZPROMO-nun icraçı direktoru Yusif Abdullayev könüllülərlə öz təcrübələrini bölüşüblər. Onlar karyera inkişafı ilə bağlı tövsiyələr verib, eyni zamanda gənclərin suallarını cavablandırıblar.

Qeyd edək ki, Azərbaycan Qran Prisi 2025 üçün könüllü qeydiyyatı rekord göstərici ilə başa çatıb. Cəmi 48 saat ərzində otuz bir mindən çox müraciət qeydə alınıb. Yarışda 2000-ə yaxın könüllünün iştirakı gözlənilir.

BŞH Akademiyası, könüllülərin şəxsi və peşəkar inkişafına dəstək məqsədilə mütəmadi olaraq təlimlər və panellər təşkil edir. Bu tədbirlərin əsas məqsədi gəncləri gələcək karyeralarına hazırlamaq, onların peşəkar bacarıqlarını artırmaq və əmək bazarında daha rəqabətədavamlı olmalarına şərait yaratmaqdır.