Uniforma və Akkreditasiya Mərkəzi: Azərbaycan Qran-prisinə hazırlığın vacib mərhələsi

Formula 1 Azərbaycan Qran-prisinin başlamasına sayılı günlər qalmış Bakı Şəhər Halqasında hazırlıqlar yekun mərhələyə daxil olur. Lakin yarışın təşkili yalnız trekdə və tribunlarda aparılan işlərdən ibarət deyil. Yarış həftəsində fəaliyyət göstərəcək minlərlə insanın akkreditasiyası, uniforma ilə təmin olunması və işə hazırlığı da böyük bir əməliyyat tələb edir. Bu prosesin əsas ünvanlarından biri isə artıq fəaliyyətə başlayan Uniforma və Akkreditasiya Mərkəzidir.

Mərkəzə hər gün yarışın təşkilinə cəlb olunan əməkdaşlar, könüllülər, marşallar, təhlükəsizlik əməkdaşları və podratçı şirkətlərin nümayəndələri müraciət edir. Burada onların qeydiyyatı aparılır, akkreditasiya kartları hazırlanır və uniformaları təqdim olunur. Yarışa qədər mərkəzdən 12000-ə yaxın akkreditasiya kartının və 8900 uniformanın verilməsi nəzərdə tutulur.

Bu intensiv işin təşkilində 120 könüllü də yaxından iştirak edir. Onlar mərkəzə gələnlərin qarşılanması və qeydiyyatından başlayaraq akkreditasiya kartlarının hazırlanması və uniformaların verilməsinə qədər müxtəlif proseslərə dəstək göstərirlər. Gün ərzində çoxsaylı əməkdaş və iştirakçı ilə işləyən könüllülər üçün bu, həm məsuliyyətli, həm də dinamik iş mühiti yaradır.