Formula 1 könüllüləri üçün seminar keçirilib

Bakı Şəhər Halqası Əməliyyat Şirkəti (BŞH) 2018 Formula 1 Azərbaycan Qran Prisi üçün qeydiyyatdan keçən könüllülərə “NLP – mükəmməl ünsiyyətin qurulma texnikası” mövzusunda seminar təşkil edib.

Seminar peşəkar təlimçi Sənan Nəcəfovun iştirakı ilə baş tutub. Seminar zamanı S.Nəcəfov uğurlu nitqin sirlərindən danışaraq vaxtın düzgün idarə olunması, nitq mədəniyyəti və bədən dili barədə könüllülərə ətraflı məlumat verib və onları maraqlandıran sualları cavablandırıb.

Bundan başqa, S.Nəcəfov seminar iştirakçıları ilə birlikdə təqdim etdiyi mövzular ətrafında əyani sınaqlar keçirib və könüllülərə Neyro Linqvistik Proqramın (NLP) geniş imkanlarını təqdim edib.

Qeyd edək ki, Bakı Şəhər Halqası Əməliyyat Şirkəti Könüllülər Proqramının iştirakçıları üçün yeni yarışa hazırlıq çərçivəsində növbəti aylarda da müxtəlif mövzularda təlim, tədbir və seminarlar keçirməyə davam edəcək.