2026 Formula 1 Qatar Airways Azərbaycan Qran Prisinin marşalları üçün təlimlər davam edir

2026 Formula 1 Qatar Airways Azərbaycan Qran Prisinə hazırlıq çərçivəsində marşallar üçün növbəti təlimlər keçirilib.

Bakı Şəhər Halqası Əməliyyat Şirkəti tərəfindən təşkil olunan təlimlərin əsas məqsədi yarış zamanı təhlükəsizliyin ən yüksək səviyyədə təmin edilməsi, mümkün risklərin minimuma endirilməsi, eləcə də fövqəladə hallarda operativ və effektiv fəaliyyət mexanizmlərinin daha da təkmilləşdirilməsidir. Formula 1 kimi yüksək sürətli və texniki baxımdan mürəkkəb idman növündə marşalların rolu xüsusi əhəmiyyət daşıyır. Onların peşəkar hazırlığı isə yarışların təhlükəsiz və fasiləsiz keçirilməsinin əsas şərtlərindən biridir.

Nəzəri məşğələlər zamanı marşallara yarışlar zamanı yarana biləcək müxtəlif vəziyyətlər barədə ətraflı məlumat verilib. Proqram təhlükəsiz şəkildə pilotun boliddən təxliyəsi, trasın operativ bərpası, fərdi mühafizə vasitələrindən düzgün istifadə və komanda daxilində effektiv koordinasiya kimi vacib bacarıqları əhatə edib.

Bakı Şəhər Halqası Əməliyyat Şirkəti tərəfindən mütəmadi olaraq keçirilən bu təlimlər marşalların peşəkar bilik və bacarıqlarının artırılmasına, həmçinin yarışların beynəlxalq təhlükəsizlik standartlarına uyğun şəkildə təşkilinə töhfə verir.

2026 Formula 1 Qatar Airways Azərbaycan Qran Prisi 24-26 sentyabr tarixlərində keçiriləcək.