Bakı Şəhər Halqasında yolların hazırlığı davam edir

“Tribunalara və trekə qayıtmağımıza sevinirik. Bakı Şəhər Halqasının əməkdaşları  yarışın yaddaqalan olması üçün çalışırlar. Ümid edirik ki, hər il olduğu kimi, bu il də  Formula 1 Azərbaycan  Qran Prisi  şəhər trekləri arasında gözlənilməz və həyəcanlı nəticələri ilə azarkeşləri sevindirəcək.”- deyə Bakı Şəhər Halqası Əməliyyat Şirkətinin (BŞH) Yarış Obyektlərinin Tikintisi üzrə rəhbəri Tom Butçer mediaya açıqlamasında bildirib.

O, həmçinin, yolların yarışın başlamasına bir neçə gün qalmış hazır vəziyyətə gətiriləcəyini bildirib. Tom Butçer: “Beynəlxalq Avtomobil Federasiyası da yekun yoxlanışlarını apardıqdan sonra trek tam istifadəyə veriləcək. Eləcə də, paddok ərazisində infrastruktur-quraşdırma işlərinə də start verilib.”

Yarış zamanı vətəndaşların və sürücülərin təhlükəsizliyini təmin etmək məqsədilə istifadə olunan beton blokların quraşdırılması gecə saatlarında həyata keçirilir. Tikinti-quraşdırma işləri Xəqani küçəsi və Bülbül prospektinin kəsişməsindən başlayıb, bütün yarış trekini əhatə edəcək. 

Ötən ildən fərqli olaraq, builki yarış tamaşaçıların iştirakı ilə keçiriləcəyi üçün artıq Bulvar ərazisində tribunaların quraşdırılmasına da başlanılıb. 

Bakı Şəhər Halqası Əməliyyat Şirkəti vətəndaşlara tikinti-quraşdırma işləri zamanı göstərdikləri anlayışa görə öncədən təşəkkür edir.