“Böyük imkanlara kiçik addım” adlı karyera yarmarkası
8 oktyabr 2018

5 oktyabr 2018-ci il tarixində Bakı Şəhər Halqası Əməliyyat Şirkəti və Azərbaycandakı Amerika Ticarət Palatasının (“AmCham Azərbaycan”ın) birgə təşkilatçılığı ilə “Böyük imkanlara kiçik addım” adlı karyera yarmarkası Bakı Şəhər Halqası (BŞH) Akademiyasında təşkil edilib.

Yarmarkada ölkədə fəaliyyət göstərən nüfuzlu şirkət və qurumlar gənclər üçün uyğun vakansiyalarını və təcrübə proqramlarını təqdim edərək ətraflı məlumat verdilər. Tədbirdə ümumilikdə 40-a yaxın müxtəlif şirkət və qurumlar iştirak edib.

Açılış nitqi ilə çıxış edən BŞH-nin İnsan Resurları və İşçi Qüvvəsi şöbəsinin rəhbəri İranə Əhmədova iştirakçıları salamlayıb və Akademiyanın gənclər üçün yaratdığı imkanlar barədə tədbir iştirakçılarına məlumat verib. İ.Əhmədova gənclərin arzuladıqları işi tapmasına dəstək olmaq üçün tədbirdə iştirak edən təşkilat və qurumlara Bakı Şəhər Halqası Akademiyası adından təşəkkürünü bildirib: “Gənclərin inkişafı Akademiyamızın başlıca hədəfidir və bu fəaliyyətimiz ilə ölkədə aparılan gənclər siyasətinə dəstəyimizi göstəririk” Yarmarkanın keçirilməsində məqsəd gənclərin yerli şirkətlərlə əlaqə yaratmaq və CV-lərini birbaşa şirkətə təqdim etmək, karyera qurmaq istiqamətində fəaliyyətlərinin düzgün planlaşdırması uçün təcrübə proqramları, işə qəbul prosessləri ilə tanış olmaqdır.

Ümumiyyətlə Bakı Şəhər Halqası Əməliyyat Şirkətinin komandasının böyük hissəsi Azərbaycanın peşəkar gənclərindən təşkil olunub. Könüllü olan gənclərimiz də bu imkanlardan faydalana bilirlər. Belə ki, 2016-ci ildə Bakıda ilk dəfə baş tutan Formula 1 yarışında könüllü olmuş  50 nəfərdən çox gənc ötən mövsüm bu şansı əldə etdi və özlərini ən yüksək səviyyədə göstərməyi bacardı. 2018-ci ildə isə onların sayı artdı və Azərbaycan Qran Prisində daha öncəki illərdə könüllü olmuş 75 nəfər, işçi olaraq fəaliyyət göstərmişdi. Onlar, Insan resursları və işçi qüvvəsi,transport, idman əməliyyatları, məkan əməliyyatları, media əməliyyatları və digər sahələrdə uğurla fəaliyyət göstərdilər”.

“AmCham Azərbaycan”ın icraçı direktoru xanım Natəvan Məmmədova yarmarka iştirakçılarını Azerbaycan biznes sektoru adından salamlayıb: “Çox məmnunam ki, ölkəmizdəki iş adamları insan resurslarının idarə olunmasında ən qabaqcıl təcrübələrin tətbiq olumasına çalışırlar. Bunu da xüsusilə vurğulamalıyam ki, AmCham Azərbaycanın İnsan Resursları komitəsi ən çox tələb olunanlar və aktiv fəaliyyət göstərənlər sırasındadır. Ümid edirəm ki, bugünki tədbir işəgötürənlərlə (hansı ki, əksər hissəsi “AmCham”ın daimi üzvləridir) iş axtaranlar arasında effektiv əlaqə yaradacaq.

“AmCham Azərbaycan”ın İnsan Resursları üzrə komitə sədri, BP-nin Azərbaycan, Gürcüstan və Türkiyə regionu İnsan Resursları üzrə meneceri Elnarə Məmmədova çıxışında bu cür tədbirlərin önəmini vurğulayıb. “Karyera yarmarkası iş axtaran, həmçinin işçi axtaranları bir araya gətirib. Özünü inkişaf etdirmək istəyən gənclər üçün bu əvəzsiz imkandır. Burada iştirak edən ölkənin aparıcı şirkətlərində iş və ya təcrübə proqramına qatılmaq sözsüz ki, gənclər üçün geniş imkanlar yaradacaq”. 

Ümumilikdə 900-dən çox gənc sözügedən tədbirdə iştirak etməklə yaradılan geniş imkanlara kiçik addım atmış oldu. Yarmarka iştirakçılarının əksəriyyəti fəaliyyətinə Formula 1 Azərbaycan Qran Prisi və digər tədbirlərdə könüllü kimi başlayan gənclərdən ibarət idi.