Bakı Şəhər Halqası marşallar üçün növbəti praktiki təlim keçirib

2022-ci il Formula 1 Azərbaycan Qran Prisinə hazırlıq çərçivəsində Bakı Şəhər Halqası Əməliyyat Şirkəti və Bakı Marşal Klubunun təşkilatçılığı ilə marşallar üçün təlim keçirilib.

21 may tarixində baş tutan təlim Fövqəladə Hallar Nazirliyinin Akademiyasında keçirilib.

Təlimlərin keçirilməsində məqsəd yarışlar zamanı yanğınla bağlı fövqəladə hal yarandıqda yanğınların qarşısının alınması və nəticələrin çevik şəkildə aradan qaldırılması üçün marşalların peşəkarlığının daha da artırılmasıdır.

Nəzəri və praktik hissələrdən ibarət bu təlimlərdə ümumilikdə 64 nəfəri Fövqəladə Hallar Nazirliyinin əməkdaşı olmaqla 188 yerli marşal iştirak edib.

Akademiyanın xüsusi ixtisaslı təlim-tədris heyəti iştirakçılara yanğın təhlükəsizliyinə dair biliklərin aşılanması, yanğının qarşısının alınması və xilasetmə tədbirlərinin təşkili istiqamətində bacarıqlarının möhkəmləndirilməsi məqsədilə vacib təqdimatlar edib. Bundan əlavə, yanğın təhlükəsizliyi və xilasetmə işlərində istifadə olunan xüsusi texnika və avadanlıqlarla davranış qaydaları da əyani vasitələrlə izah olunub.

Qeyd edək ki, növbəti Formula 1 Azərbaycan Qran Prisi cari ilin 10-12 iyun tarixlərində keçiriləcək. Yarış müddətində 1400 marşal iştirak edəcək.